حلم أجمل صبية
مخنوق يابلدى ....
وأنا حلمى أبقى مرة فوق .. أو حتى افوق
من هم شايله وأنا شايفك بتغرقى
أنا حلمى مش قادر يكون
طيب قوليلى ازاى يكون .. جوه الشجون
ببكى من غير دموع
على حال وصلنا ليه يبكى العيون
مش قادر اكتب ولا أقول
وهم وخيال جوه القلم محتاس يقول
طب أقولك ايه واعديلك ايه
وأنا بشتكى معرفش ضاع منى القلم
معرفش فين !!!
وقعدت جنب الحيط لوحدى
اشتكى كل الهموم
ولقتنى بسأل نفسى بعلو صوتى واقول فى ايه
ردت .......
وكان الرد قاسى
زلزل حجر هد الجبال من علو صوت مخنوق
راح تكتب ايه وحكايتك ايه
تكتب حكاية دم فى عروق الحروف مكتوم
ولا حكاية شعب عزيز بقى محروم
كسرت جدران الخوف وخرجت صرختى
راح اكتب يابلدى....
راح اكتب كلمة الحق ولو حطوا على رقبتى سيوف ...
شايف ولادك السهرانين الشقيانين
دمهم معجون بخوف
متعلقين بحبال طويلة نهايتها فين
نهايتها فى ادين ناس ملهاش قلوب
سامحينى يابلدى انا مستحى
من نفسى ومن سلبيتى بس اعمل ايه
طب عيب عليكى يانفسى مستسلمة للذل ليه
ردت عليا الارض الطيبه
الذنب مش ذنبك ياولدى
طب ذنب مين !!!
مش قادر المح ياحبيبتى دمعتك ...
نفسى ارجع بسمتك
واسمع بشاير ضحكتك
وأشوف ولادك مبسوطين
نفسى يابلدى ترجعى تانى عفية
و اترمى فى حضنك ياامى
وترجعى تانى أجمل صبية
الأربعاء يونيو 23, 2010 12:45 am
