خرافات خرافات!!

يا جماعة..هناك نظرية مسيطرة على بيوتنا المصرية .... نظرية ايه؟!
نظرية الخرافة..لا تنظر نظرة استهزاء ،نعم .. فكر قليلا ستجد انك ايضا بتعمل حاجات مش عارف ليه بتعملها؟ يمكن حاجات تعودنا عليها ، حاجات تجلب التفاؤل
فالخيال الخصب للمواطن المصرى خاصة القروى افرز مئات القصص، والتى ظهرت فى البداية للتسلية او لتخويف الصغار،او انتجت عن موقف معين، وفى النهاية ذهب اصحاب هذة الحكايات ، وبقيت مع المصريين الى الان .....مش مصدق ؟!
طيب فى دراسة اجريت منذ فترة بالمركز القومى للبحوث، اجراها الباحثان : نجيب اسكندر و رشدى منصور.. توصلا من خلالهما الى ان 63% من المصريين يؤمنون بالخرافة ، و11% منهم من المثقفين والسياسين والفنانين ، و31% من المصريين يؤمنون بتقمص الارواح والاعتقاد بالجن والعفاريت ،200 الف مصرى يعتقدون بتصنيف الجان الى احمر وازرق ، وان15% من سكان مصر يتحاشون ضرب القطط و الكلاب ليلا لاعتقادهم بان العفاريت تتشكل بصورتهم ، كمان يؤمن البعض بان الجان قادر على الزواج من النساء او رجالهم و الانجاب منهم ومن التخريف دى
(خرافة تحفة تعتبر من التقاليد ) لما تحتاروا فى تسمية المولود احضروا شمعا بعدد الاسامى التى اخترتموها ، وضعوها فى طبق فيه ملح ، و ثبتو الشمع فى هذا الطبق ، وولعوا الشموع كلها ، وسوف تنطفى شمعة تلو الاخرى ، الشمعة التى تبقى سموا بها المولود
(اغرب تقاليع بحرى ) لما بيجى المولود يا خدو المشيمة بتاعته و يرموها فى النيل ، وهم بيضحكوا عشان حياته تبقى سعيدة و لازم لازم يضحكوا والا هيعيش تعيس
ومن العادات كمان لما الطفل بيبتدى يغير الاسنان اللبنية قبل ما ينام يحط السنة تحت المخدة عشان يصحى يلاقى معاها فلوس ، بس مكانتش بتحصل دايما ، وتانى يوم يصحى يبص ناحية الشمس و يرمى السنة وهو بيقول يا شمس يا شموسة خدى سنة الجاموسة ،وهاتى سنة العروسة
(يا ساتر استر يا رب تخاريف تخاريف)
يا ساتر سايب المقص مفتوح اقفله فورا ، اصله بيجيب النحس ، والنكد لاهل البيت ن ولو بيجبيلك كوابيس بالليل حط المقص تحت المخدة ، هيمنعها وهتنام كويس- الله اعلم !!
اما نثر قشر الثوم على ارض المنزل ، فانه يجلب الفقر ، ومن خطى فوقه اصابه النكد ، كمان الجرى بالليل فى المنزل يزعج العفاريت ، وممنوع الكنس بالليل ايضا حتى لا نزعجهم ،ونسمع ربة المنزل تقول ليلا:(لا بنكنس مال ولاعيال ) حتى تامن شر الجان!
ولوعايز تطفش ضيف رزلبيجيلك على طول حط وراء باب الشقة مقشة ، واغرز فيها ابرة ، ولو حد فتح الشمسية فى البيت ده فال وحش كلها حاجات سمعناها من الاجداد ما حدش ياخد ابرة من ايد حد تانى .... لحسن يتعاركوا ، قلب الشبشب يجيب النكد ، يا ناس يا شر كفاية قر ..... عين الحسود فيها عود .... العين صابتنى ورب العرش نجانى .... اغلب المصريين يؤمنون بالحسد ،وده مش عيب فالحسد مذكور فى القران ، ولكن طرق الوقاية من الحسد هى اللى منتهى العيب .
فالكثيرون يؤمنون بان الحجاب يقى من " عين الحسود" وايضا وضع قليل من الملح فى كيس يعلق فى رقبة الاطفال .
وطرق الوقاية التى وضعها المصريون للوقاية من الحسد كثيرة ، منها :"البخور""وخمسةوخميسة"و"العروسة الورقية" التى يتم ثقبها بابرة الخياطة باسماء من يريدون منع حسدهم ، وذللك بقول من عين فلان وفلان الى ان تنتهى قائمة الاسماء ،ثم يتم حرق هذة العروس الورقية و يحتفظ بناتج احراقها ،و رسمه على شكل صليب على جبهة الشخص المحسود .،وغيرها من الخرافات التى تنتشرفى مصر.
(وعلى راى المثل) لا احد ينكر ان تراثنا ملى بالامثال الشعبية الجميلة ،حلو ان يكون عندنا امثال شعبية، لكن مش دايما امثالنا بتناسب كل المواقف لان كل مثل منهم قيل على لسان شخص مثلى ومثلك، وفى سيلق موقف معين.
طبعا احنا كلنا عارفين امثالنا : اسمحو لى اعرض عليكم امثالا نيولوك ومن يعلم يمكن تتوراثها الاجيال بعدنا :من طلب العلا يتفضل فى كابينه 4...... اللى معاه قرش محيره يجيب حمام ويحمره.....اللى ياكل لوحده يشبع
(ومن امثلة عربيات النقل)
ربنا يحميكى من الميكانيكى......اجرى جرى الوحوش الاوتوبيس ما تلحقوش....... الحلوة من دمياط و عليها اقساط....... قصة كفاح مش جاية على المرتاح
ها الان اقتنعت ان مجتمعنا المصرى خرافات خرافات ،لو فكرنا قليلا سنجد انفسنا نتصرف بشكل لا نعرف لماذا نخاف من حاجات ؟،بنحب حاجات؟، اشياء اصبحت مسلمات ،وللاسف هذا بالنسبة للمثقفين قبل ما يكون للجاهلين،يعنى اذا كان المثقفيين انفسهم يؤمنون بتلك الاشياء ،من سيقوم بتوعية هؤلاء....يا جماعة تعالو نفكر شوية كفاية خرافاااااااات.
ودلوقتى خلصنا بعد ما تخلص الموضوع اقفل الصفحة من اليمين احسن لو قفلتها من الشمال هيكون فال وحش....اللهم احفظنا.......:

ارجوكو يا جماعة اللى قرا الموضوع يرد يقولى ايه رايه فيه عشان انا بجد تعب فى الموضوع
سكرة الاهلوية

لأ طبعا أنا مش مؤمنه بهذه الخرافات لأن الإيمان بها أصلا حرام لأنه شرك بالله يعنى إيه نروح لدجال علشان وحده تخلف أويشفى لها ابنها كل ده بإيد ربنا سبحانه وتعالى
ومش فاهمه يعنى إيه روح تدخل قطه أوكلب
الروح فى الأخره يافى نعيم يا فى عذاب ربنا يعفينا ويجمعنا فى الجنه
لو فى نعيم ازاى تقدر تسيبه علشان تتدخل جسم حيوان
ولو فى عذاب محدش يقدر يمنع عنها عذاب ربنا
وبعدين ربنا خلق الإنسان وكرمه فازاى الروح تتدخل جوا جسم حيوان
ديه خرافات طبعا وأنا مش مؤمنه بها على الإطلاق
وبعدين إحنا فى القرن 21 ازاى فى ناس مصدقه لحد دلوقت الكلام ده